مقروض الفستق السوري
 |
| مقروط الفستق السوري طريقة عمل مقروض الفستق السوري سهلة و سريعة و الاهم مضمونة و لذيذة . الطريقة: العجينة:
تلاته كوب سميد ناعم اتحطي عليهن كوب ونص دقيق اتخلطيهن مع بعض وتسخني كوب وربع زيت اتحبو اتخلطو مع الزيت النباتي زيت زيتون كل واحد ورغبته المهم كمية الزيت امتاعي كوب وربع التسخين مش اتخلو الزيت يغلي ساخنوه شويه هذا يساعد ان المقروض ايجيكم هش ويذوب بعدين ضيفو الزيت علي السميد وقلبوه اكويس وغطوه وخلوه يبات في الزيت ليله كامله يعني نعملو ونخليه يبات احسن
و تاني يوم انضيف علي عجينة مقروض الفستق ، ربع ملعقه صغيره بيكنبودر ونعجنها كويس ونقسمها الي تلات أقسام ليش قسمتها عشان ناخذ بالجزء ونشتغل بيه و خذيت جزء من العجينه نكون مجهزه كوب ماء دافي وحاطه فيه زيت عطر او ماء زهر وناخذ من الميه شويه ونبدأ نعجن لعند نتحصل علي عجينه ملسه و نشكل العجينه علي شكل طولي ونفردها شويه ونحط الحشوة ونسكرها كويس ونبدأ نبرم فيها لقدام وللخلف لعند تتساوا معاي و انجو للقص اول حاجه انا انحب انقيس باصابعي الاتنين هذا أفضل حجم المقروض بعدين نبدأ انقص و كل ما نجهز مجموعه انغطيها بالنايلو عشان ما يجفش عشان نبدأ ننقش علي راحتي  مقروض الفستق السوري و بعد كملت مقروضي كله انطيبه في كوشه درجة الحرارة 160 لعند ما يطيب ويتحمر شويه في الي يحبه متحمر وواجد و بعد طاب وهو ساخن انصب عليه عسل يكون ثقيل قوامه نفس عسل النحل ويكون بارد والمقروض ساخن المهم اتغطو المقروض بالكامل تقدرو اتحطو في العسل زيت عطره وخلوه في العسل يومين
الحشوة : بالنسبه لحشوة الفستق طبعاً أنا عملتها على طريقتي استعملت كوبين فستق مطحون ناعم زي بودرة الوز طحنته في مطحنة البهارات مش ست البيت الفستق مش محمس ونأكد عالنقطه هذي عشان لما اتحطي الفستق في الكوشه ما يزيدش يتحمر اخري.
اتحطي عالفستق ملعقتين كبار سكر عادي ونجو هنا انلمو الفستق مع السكر اعجنو الفستق مع السكر بي ميه من الشيشمه وحده تقولي ليش مش ماء زهر او ورد لأنهن ايسودن الفستق لما تحطيه في الكوشه باهي وحده تقولي ليش مش عسل لأن في أحتمال كبير العسل ايخلي الفستق يابس لكن الميه لأ هي ممتازة مع الفستق. كميه الميه حسب ما يلتم معاكم الفستق ويقعد زي العجينة يعني رشو ميه واعجنو فهتو عليا بعدين شكلو الفستق معصم حسب ما تحبوه غليظ أو رقيق لكن غليظ احلي طبعا . صحة وعافية. |
عزيزي الزائر لا تخرج قبل إبداء رأيك في الموضوع فذالك يهمنا